Jos 4 | KSD | STEP | Ma ba ra tarai par dia ga bolo lake mutu ta ra Iordan, ra Luluai i ga biti tai Iosua dari:

Joshua 4

Di tak pa ra vinun ma ivu vat ta ra bala na Iordan

1 Ma ba ra tarai par dia ga bolo lake mutu ta ra Iordan, ra Luluai i ga biti tai Iosua dari: 2 Avat a pilak pa a vinun ma a ura tutana ta ra tarai, tikatika na tutana ure tikatika na vuna tarai, 3 ma avat a ve diat dari: Avat a tak pa ra vinun ma a ivu vat ta ra bala na Iordan, ta nam ra pakana a kak i ra umana tena tinabar i ga tur dekdek tana, ma avat a kap diat uro, ma avat a vung diat ta nam ra gunan ba avat a va tana go ra marum. 4 Ma Iosua i ga oro pa ra vinun ma a ura tutana nina i ga tibe diat ta ra tarai Israel, tikatika na tutana ure tikatika na vuna tarai. 5 Ma Iosua i ga biti ta diat dari: Avat a bolo lake ta ra bala na Iordan ta ra luaina mata i ra bok kai ra Luluai kavava God, ma tikatikai ta vavat na puak pa tika na vat ta ra ul a varana, varogop ma ra niluluk i ra lavur vuna tarai Israel, 6 Upi go na varogop ma ra vakilang pire vavat, ba ra umana natu i vavat diat a tir avat ta ra umana kilala namur dari: Ava ra kukurai go ra umana vat? 7 Ma avat a biti ta diat dari: Tago a tava ta ra Iordan i ga takunu varbaiai ta ra luaina mata i ra bok na kunubu kai ra Luluai; ba i ga vana bolo ta ra Iordan, a tava ta ra Iordan i ga takunu varbaiai; ma go ra umana vat diat a varogop ma ra magit na varvanuknuk pire ra tarai Israel pa na mutu.

8 Ma ra tarai Israel dia ga pait nam ra magit Iosua i ga vartuluai pire diat ure, ma dia ga tak pa ra vinun ma a ivu vat kan ra bala na Iordan, da ra Luluai i ga ve Iosua, varogop ma ra niluluk i ra lavur vuna tarai Israel; ma dia ga puak pa diat tar ta ra pakana dia ga va tana, ma dia ga vung diat abara. 9 Ma Iosua i ga vatur bula a vinun ma a ura vat ta ra bala na Iordan, ta nam ra pakana ba ra.kau i ra umana tena tinabar nina dia ga kip ra bok na kunubu i ga tur tana; ma gori boko dia tur ie.

10 Tago ra umana tena tinabar nina dia ga kip ra bok dia ga tur livuan ta ra Iordan, tuk tar ta nam ba di ga pait rit ra lavur magit ba ra Luluai i ga vartuluai tana pire Iosua upi na ve ra tarai, varogop ma ra lavur magit Moses i ga tul tar ia tai Iosua; ma ra tarai dia ga kavie ra vinavana lake. 11 Ma ba ra tarai par dia ga vana lake mutu, a bok kai ra Luluai bula i ga vana lake, ma ra umana tena tinabar bula, ta ra luaina mata i ra tarai. 12 Ma ra tarai Ruben, ma ra tarai Gad, ma ra ngungu vuna tarai Manase bula, dia ga vana lake ta ra luaina mata i ra tarai Israel ma dia ga kap vargal, da Moses i ga ve diat; 13 a ivat na vinun na arip na marmar bar dia ga vaninara upi ra vinarubu ma dia ga vana lake ta ra luaina mata i ra Luluai, upi diat a varubu ta ra gunan i tamataman maravai Ieriko. 14 Ta nam ra bung ra Luluai i ga vangala Iosua ta ra luaina mata i ra tarai Israel par, ma dia ga ru ia da di ga ru Moses ta kana lavur bung na nilaun par.

15 Ma ra Luluai i ga tata pire Iosua, ma i ga biti: 16 Una ve ra umana tena tinabar nina dia kip ra bok na tinata ba diat a irop kan ra Iordan. 17 Io, Iosua i ga vartuluai pire ra umana tena tinabar dari: Avat a irop kan ra Iordan. 18 Ma ba ra umana tena tinabar nina dia ga kip ra bok na kunubu kai ra Luluai dia ga tutua kan ra bala na Iordan, ma ra kau i ra umana tena tinabar i ga rua ra pia i ge, ra tava ta ra Iordan i ga alir mulai ta kana nga, ma i ga lubu lake ra lavur paparaina da lua.

19 Ma ra tarai dia ga tutua kan ra Iordan ta ra vavinun na bung ta ra luaina gai, ma dia ga ki pit Gilgal ta ra papar a taur tai Ieriko. 20 Ma Iosua i ga vatur nam ra vinun ma a ura vat, nina dia ga tak pa diat ta ra Iordan, aro Gilgal. 21 Ma i ga biti ta ra tarai Israel dari: Ari a umana natu i vavat diat a tir ra umana tama i diat ta ra e namur dari, Ava ra kukurai go ra umana vat? 22 io, avat a vateten ra umana natu i vavat tana dari: Israel i ga vana lake ta go ra Iordan ta ra pia i ge. 23 Tago ra Luluai kavava God i ga vamama ra tava ta ra Iordan ta ra luaina mata i vavat tuk ta nam ra pakana bung ba ava ga bolo lake tana, da ra Luluai kavava God i ga pait ia ta ra Ta Meme, ba i ga vamama ta ra luaina mata i dat tuk tar ta nam ba da ga bolo lake tana, 24 upi ra tarai par ta ra rakarakan a gunagunan diat a nunure ba ra lima i ra Luluai i dekdek; upi avat a ru vatikene ra Luluai kavava God.